Liburu honen bidez, XX. mendeko gernikar emakumeak ezagutzeko ate bat zabaldu nahi dugu, herriko protagonista ahaztu hauei omenaldi xume bat egin euren izenak eta aurpegiak berreskuratuz. Gure amak, amumak eta berramumak ezagutu, gure herria ere hobeto ezagutu ahal izateko.

Jarduera ekonomiko, maila sozial eta garai desberdinetako emakumeak bildu nahi ditugu. Honetarako mende hasieran jaiotako emakumeak, gerraostean jaiotakoak eta frankismoaren erdialdean jaiotakoak ere, elkarrizketatu ditugu. Testigantzen bidez, XX. mendean zehar ibilbide bat osatu nahi izan dugu emakume desberdinen begirada islatuz: umezainak, dendariak, emaginak, alpargaterak, artistak kirolariak, tabernerak, etxekoandreak, baserritarrak...